أيها المسئول
هل أنت المسئول ؟

هل أنت المسئول عن شاب تخرج ولم يجد ما يعمله غير طريق الانحراف والضياع ؟

هل أنت المسئول عن فتاه لم تجد زيجة هنيه فتزوجت من عجوز

لأن حبيبها لم يستطع على الزواج منها بظروفه الصعبة

هل أنت المسئول عن أب لم يجد لأولاده العيشة الكريمة فمات من غيظه وحسرته

هل أنت المسئول عن ابن لم يستطع أباه أن يتمم تعليمه هو وإخوته فاتجهوا أما للضياع في الدنيا ودنيا الانحراف فزادت نسبه الجريمة أو الطريق الأخر وهو النصب وكلاهما غير شرعي

هل أنت المسئول عن أم لا تستطع أن تكفى طلبات بيتها بعد وفاة زوجها وما زالت تجرى وراء فتافيت المعاش وان أخذته لن يكفى فهو فتافيت

أقول لك أيها المسئول هل هل أنت المسئول عن الأسرة المصرية ؟

أن لم تكن أنت المسئول فمن المسئول

أيها المسئول اجبني من المسئول؟

إن تعرفت على المسئول الحقيقى فأخبره وقل له حل هذه المشاكل أو إسعى في حلها قبل أن يحدث شئ من اثنين
إما أن تنهار هذه الاسره فتموت وبهذا تموت مصر
أوأن تنهار الأسرة وتتجه للكسب الغير مشروع وبالتالي تموت مصر من الخراب الذي سيحل عليها

أيها المسئول إن كنت لست المسئول فتنحى جانبا ودع من يقوى على المسئولية أن يعمل بدلا منك دون محسوبيه ولا نفاق

ولكن بكل نزاهه وحياديه

كل هذه اسئله دارت بخاطرى عندما رأيت حال الأسره المصريه مع انتشار الكوارث بها ولا اعلم الى اين تذهب هذه الأسره

كل سؤال اعلم انه يحتاج الى موضوع مستقل ولكن اجمعتها ليتأمل فيها المسئول دون تعب او مشقه لعلى اكون سبب ان يغير فكره او يطوره لصالح هذه الأسره وبالتالى يكون لصالح مصر

كده او كده انا ميت ميت

كده اوكده انا ميت ميت
كلمه صعبه والسبب فى انه يقولها ظروف صعبه

ليه مصر وليه شباب مصر واشمعنا إحنا المصريين لما نسافر بنكون مهانين بره بلدنا ما الدنيا كلها بتسافر
كلمات كثيره مع نبرة حزن من شاب مصرى صديق شخصى لى حاول السفر وكان ماكان من امور النصب والغرق والنجاه دار هذا الحوار

البدايه

· انت عارف انك كنت ممكن تغرق فى البحر؟
هو : وهتفرق فى ايه؟
· مش فارقه معاك ؟
هو : يعنى انا كده كده غرقان غرقان بل بالعكس كان هناك ممكن اعدى البحر انما هنا مش لاقى بحر اعديه هناك كنت ممكن اعدى لبر الأمان انا واهلى انما هنا الأمان مش لقينه
· وانت شايف ده حل ؟
هو : انت عندك حل تانى ؟
· ايه اللى مش عاجبك فى البلد دى؟
هو : انت ايه اللى عاجبك فيها ؟
· مش جايز ينصلح حالها وبالتالى حالك ينصلح معاها
هو : لحد امته هنضحك على نفسنا يا عم البلد دى اللى فوق بيعلى اكتر واللى تحت بينزل اكتر واكتر شوف انا متخرج من امته واشتغلت فى ايه واللى بكسبه بيكفى بيتى ويكفينى ولا لأ ؟
· انت جيبت فلوس السفر منين ؟

هو : تحويشة عمرى انا وأهلى والباقى سلفه من ايدى الأحباب والاصحاب وجمعيه وكده وانت عارف الباقى
· وكنت ناوى على ايه فى سفرك ده؟
هو : كنت ناوى ارفع اهلى من الفقر اللى ملازمهم ده ونعيش زى باقى الخلق
· وانت كده مش عايش ؟
هو : ان كان على الرضا بقضاء الله فأنت اعلم الناس بأنى والحمد لله شاكر لنعمه عليا انما لما نفكر فى الماديات وتحسين المعيشه اعتقد انه من حقى انى افكر انى اعيش فى مستوى احسن من المستوى المتدنى ده اللى انا فيه انا واهلى وبصراحه لو فضلت هنا طول عمرى ماسك لناس حساباتهم واعمل بروحين حتى اتزوج لن اتزوج ابدا وهفضل فى الشقا ده لغاية ما اموت
· طيب ما تتكل على ربنا وهو اكيد هيساعدك
هو : ونعم بالله وانا كمان متكل على ربنا بس كمان اسعى ياعبد
· واللى انت عملته ده سعى ولا انتحار لما تروح ترمى نفسك فى التهلكه
هو : طيب واللى احنا فى ده اسمه ايه ؟
· اللى هو ايه ؟
هو : حالنا فى بلدنا نسميه ايه ؟
· هو ايه اللى فى حال البلد
هو : حالنا انا بسميه الموت البطئ واللى يستسلم للموت ده ده كمان يبقى متهم بالإنتحار
· طيب ما تحاول تغير
هو : اغير ايه ؟ انت ناسى احنا فين ولا ولا اللى يتكلم بيجراله ايه ولا انت مفكر ان فى ديمقراطيه صحيح
انسى يا صاحبى
· اخر سؤال بتحب مصر ؟؟
هو : بحبها اكتر من نفسى بس بكره حكوماتها

كان هذا الحوار واعتقد انه حوار مش مع هذا الشاب فقط وانما مع شباب كتير جدا

وعلى فكره انا استأذنته انى انشر هذا الربورتاج وهو وافق بدون حتى مجرد تفكير

ولكم التعليق

يوم 6إبريل من العام الماضى كان حدث كبير جدا وهو اضراب الشعب المصرى طبعا مش كله انا عملت اضراب من نوع خاص جدا وهو كان الإنطلاقه الرسميه لمدونتى العزيزه إبن مصر
كنت عارف ميعاد الإضراب مسبقا ومش لقيت حاجه احسن من المدونه انى اوصل بيها صوتى لكل اللى انا عايزه
عرفت ناس كويسين كتييير وعرفت ان فيه ناس مش كويسه برضه بس اكتر بكتييييييييير
أتعاملت مع المدونين اللي لقيت فيهم الصديق اللى ممكن احكيله عن سرى ولقيت فيهم اللى مش ينفع اعتبره حتى زميل

فبقول لمدونتي الغالية عليا جدا

(إبن مصر ) كل سنه وهى طيبه

نيجى بقا لموضوعنا

فى سلبيات كتير وبتحصل فى كل يوم انما انها تتجمع كلها فى يوم واحد يبقى اكيد فى حاجه غلط


اول حاجه على الصبح راكب العربيه ورايح مصر ركبت العربيه فوجئت بلأخ بيشرب سيجاره فى الكرسى اللى ورايا
كده على الصبح يا عم الحج والله مش ينفع ممكن تطفى السيجاره ده مش أنا دي انسه كانت موجودة

دى صوره من قلب الميكروباص على الجدار اعتقد كلنا بنشوفها

صحيح هى طلبتها بنرفزه ولكن مش مهم المهم انه يقول طيب مش رميها وكده

وده الحوار
هي : إيه ده إإإإإيه ده
هو فيه أيـــــــــــه وأخينا ده من نوعية الناس اللي ممكن يقال عليهم واديا ابوشفه هات الساطور من عندك فى وشه كام شارع كلهم فتحين على بعض محتاج 20 عملية تجميل

هى :سيجاره فىا لعربيه مش انت عارف ان ده ممنوع بصوت عالى جدا ونرفزه

هو : مهيمنيش الكلام ده
انا بقا بكل شهامه طيب بعد ازنك ممكن تطفى السيجاره دى فيها اضرار كتير وطبعا انا بتكلم بأدب وبإحترام ان كان بيزعق فى الأنسه ممكن يعمل معاى انا ايه ممكن الاقى مطوه ضربها فى وشى وابقا انا ابو شفتوره
المهم
هو : أنت مش شايف البت دي بتتكلم ازاى يا يا هندزه يقصد هندسه طبعا
انا : معلش خليها عليا انا
هى : بت بت ايه يا بنى ادم إنت
هو : اتفضل يا عم وعوزنى ارميها
انا : ممكن تهدى بقا شويه يا انسه
هى : بزعيق فى وشى لالا انا عند اول كمين هقولهم وهعرفهم كمان ان السواق ممنعوش
هو : مش مهم ادفع المخالفه انا ايه رأيك بقا

انا: طيب ممكن عشان خاطرى انا ترمى السيجاره اللى قربت تخلص واحنا بنتكلم
هو : مش شايف يا هندزه بس عشان خاطرك انت بس اهو ورماها ويرجع يقول بصوت غيرب مش عارف طالع من اى حته فى جسمه اهو رمناها يا أبله

والسؤال الذى يطرح نفسه لو فعلا واحد زى ده يقدر على اللى فى العربيه كلها ممكن يكون فوق القانون بقوته وفلوسه لدرجة انه مضحى بالمخالفه فى سبيل انه يعاند ولا ممكن تكون المخالفه اكبر بإنه ينزل من العربيه ده لو فى حد قدر له

السلبيه التانيه
الموبايل الصينى اللى بقا فى يد الجميع كبير وفاهم الغلط من الصح وبيعمل الغلط وصغير ومش فاهم حتى الدنيا ماشيه ازاى
بقيت اركب العربيه الاقى كل واحد ماسك الموبايل بيسمع اغنيه مفضله لديه وياريتها اغنيه بجد انما تلاقى واحد مش عارف نفسه وبيسأل هو مين وبيوق انه هو مش هو وحاجات غريبه رزع وتخبيط وخلاص حاجات تجيب الصداع لا وماسك الموبايل فى ايده بطريقه تعلى الصوت اكتر واكتر حاجه كده تنرفز وتغيظ

طيب لو حصل وفيه واحد تعبان والشعب كله تعبان ممكن ايه يحصله لو سمع كل الأصوات دي ولو قلت لواحد ممكن تسمع انت لوحدك يقولك هو انت حد غصبك تسمع معايا يا عم منا بسمع غصب عنى يقول بلاش تركز معايا
تقوله ايه ده بقا ؟؟

السلبيه التالته بنات بس مش بنات

ده حقيقى بنات مش بنات كلمات تسمعها تخجل ما بالك لو كانت من قالتها أنثى وفى عربه 7 راكب يعنى الكلمات واصله واصله العربيه كانت فيها اربع بنات وام لبنت تانيه بس دول مع بعض يعنى العربيه عباره عن الأربع بنات وأنا والسواق والأم وبنتها
الأم دى فضلت تشتم عليهم بالهجه المصريه القديمه الجميله المليئه بالحيره من جهة هذا الجيل
وبكل تبجح واحده فيهم تقول وانتى مالك يا حجه انتى زعلانه ليه هو احنا بنتكلم معاكى ولا مع بعض
مع بعض ياختى بس ازاى تتكلموا كده والكلام ده تختشى الودن ( الأذن يعنى ) تسمعه هو مش فيه رجاله معانا ترد تقول ليها ايه رجالة ايه يا حجه الرجاله خلصوا هو بقا فيه رجاله
الرجاله كانوا زمان ايامك وايام الأسطى ايام السمنه البلدى
انما دلوقتى الرجاله بقوا بالكلام وبس ولا ايه يا باشا وطبعا انا الباشا ده طيب انا ارد اقول ايه اخرى بصيت بصة استهجان وبصيت ليها من فوق لتحت وتكشيره مليه وشى وهى مش لقت كلام تقوله غير الكلام اللى مستمره فيه ولولا ان السواق ضحى بالمشوار بتاعه وقال ليهم اللى مش هتحترم نفسها وتحترم الناس الموجوده فى العربيه قسما برب العزه لأنزلها منها وفى وسط الطريق ولا هطول سما ولا أرض
إحترمى نفسك انتى وهى
وطبعا أنا ساعتها انبهرت بالسواق وقولت اهو الرجاله بقوا مش بالكلام يا ام اللسان المتبرى منك

وطبعا كان ده فى يوم واحد
بيقولوا خبطيتن فى الرأس توجع ما بالكم بتلاته

((تنويه مهم))

طبعا الحاجات دى مش موجوده فى مجتمعنا المصرى اوى يعنى انما موجوده ولو بقدر قليل بدعى من ربنا وعايز الكل يدعى انها تختفى خالص

والكل يخاف على بعضه ونحافظ على شعور بعض

من أنتـــــــــى؟؟؟؟

من أنتــــي ؟؟؟
أأنت حلم أم خيال؟
دايما حبيبتي واخده البال
أنا عمر قلبي لغيرك ما مال
دايما بيجى في بالى سؤال

من انتـــــى ؟؟؟
أأنت الجمال والدلال
أم انتى الحقيقة والخيال
انتى الجواب والسؤال

من انتـــــى ؟؟؟؟
أأنت ساحرة تملكين القدرة على امتلاك قلوب البشر ؟؟؟؟
أم انتى عاشقة حفر اسمك على الحجر؟؟؟؟
أم انتى ملاك أتى مع الرياح وسقط مع المطر ؟؟؟

من انتــــــى ؟؟

لم أرى مثلك على مر العصور
حبك كمثل أمواج البحور
رائحتك أجمل من عطر الزهور
من انتــــى؟؟؟

حبيبتى هقولك من قلبى كلمه

تبقى معاكى طول الزمان
بحبك ياعمرى يا أغلى هديه
من ربى ليا
يسعدنى بيها فى الدنيا ديه

أخيرا رجعت تانى

يااااااااااااه
اخيرا رجعت تانى للمدونه
والله وحشتنى جدا
بس طبعا لازم اشكر كل اللى سألوا عليا وقالوا ابن مصر بطل تدوين ولا ايه

فالحقيقه كنت قريب جدا انى ابطل تدوين
وده لأنى حبيت العالم ده اوى
غريبه صح؟!!
انا اللى اعرفه ان اللى بيحب حد مش بيحب يسيبه ابدا ولكن لما ده بيتسبب فى اهانه ليه اعتقد يبقى بلاش يكمل احسن .
متتخضوش
الموضوع وما فيه انى كنت ادخل على المدونه بتاعة اى حد من اصدقائنا المدونين لو التدوينه مش عجبتنى بسيبها وبخرج من غير ما اسيب اى كومنت لا بالسلب ولا بالإيجاب وده لأنه قبل كده ومن فتره طويله حصلت لى مشكله انى قلت اللى رأى فى الموضوع فصاحب المدونه طردنى منها وقالى انه مش عايزنى ادخل المدونه بتاعته تانى فقولت خلاص علشان انا عارف نفسى لما بتكلم ومش بخاف من اى حد قولت لو لقيت اى موضوع مش عجبنى عند حد من اصدقائنا المدونين اخرج وخلاص وبلاش اعلق واخرج ومش عارف ان كان صح ولا غلط المهم
بس جيت من فتره ليست بالطويلة ايام الحرب على غزه ولقيت أن واحد والله معرفش انا وصلت للمدونه بتاعته ازاى انما وصلت وخلاص عن طريق البحث فى النت اللى مش بيخلص الجرى فيه
المهم لقيت الراجل بيتكلم فى الدين فى مواضيع كتيره وهو مش بيفهم اصلا فى الدين فحاولت افهمه وكمان والموضوع اللى علقت عليه كان موضوع لغزه عنده وكان بيشتم فى الفلسطينين بطريقه مهينه جدا وأديته ميلى نتكلم ونوصل لوجهة النظر بتاعته وياإما يقنعنى ياإما اقنعه
دخل واتكلمنا ولكنى فوجئت بإنسان ليس على اى قدر من الخلق وقلت لما يكون ده مدون ممكن يوصل اى معلومه هو عايزه والمفاجئة انى لقيت حد اعرفه وسايب عنده كومنت لمجرد انه صديق ليه فموافق على كلامه على الفلسطينيين ووضحت له مين دول وقولت له انهم دخلوا عنده ووافقوه على كلامه وفى مدونات ثانيه متعاطفين ومخالفين رأيه تماما ده كان عن طريق كلامى مع واحد ولا يعرف عن الزوق ولا الإحترام اى شئ منتهى قلة الزوق فى الحوار ومنتهى قلة الأدب فى المناقشة طبعا كان طبيعي أنى اعمله له بلوك ودلته من عندي تماما ولو تلاحظوا في البوست الأخير بتاعى كاتب انى هتاخر وقولت(وعفوا للتأخير عن المتابعة)ولكن كنير مش أخذوا بالهم من الجملة وعدت وخلاص
والمهم انى رجعت وربنا يوفق
وفى الفتره اللى فاتت دى ناس كتير سألت وبشكرهم وكتير سألوا عايز يعرف ايه اللى حصل
وهو ده اللى حصل وعايزكوا تفيدونى فى الموضوع ده
ومن اهم اخبارى فى الفترة دى الخطوبة بتاعتى على بنت عمى وده بوست كامل عملته الرائعه دائما الرقيقه فى مشاعرها بنت غزه إشراقه وبشكرها عليه جدا جدا جدا ومش عارف اعبر عن مقدار سعادتى بالبوست اللى هى عملته ده وعقبالها يارب وافرح ليها واعملها حفله فى مدونتي واعزم كل المدونين
معلش البوست طويل ولكن جعان تدوين بقا

تحياتي للجميع وبجد والله وحشتونى

توضيح لمن يرغب

بسم الله الرحمن الرحيم

(( يَا أَيُّهَا الَّذِينَ آمَنُوا إِنْ تَنْصُرُوا اللَّهَ يَنْصُرْكُمْ وَيُثَبِّتْ أقدامكم ))

اخوانى هناك توضيح لمن يرغب ان يتحدث عن القضيه الفلسطينيه بشكل او بأخر

وسؤال يطرح نفسه على بعض منا
وهو لماذا مصر بالذات هى التى تستهدف من كلمات وعبارات لاسعه وتحميل مصر ما يحدث فى غزه دون باقى الأنظمه العربيه ؟؟؟؟؟

الإجابه تتلخص فى الآتى

اولا مصر هى الدول الأم لكل العرب ومن الواجب على الأم ان ترعى أبنائها ولا بلاش كلام الشعر ده

نقول ثانيا
ان مصر هى الدوله الوحيده المجاوره لغزه

فغزه محاصره من كل الإتجاهات ماعدا اتجاه مصر عن طريق معبر فهل يعقل يا ساده ان تكون مصر هى المتنفس الوحيد لغزه ان تغلق منفذها

متمثلا فى معبرها وتحاصر غزه مع إسرائيل هل هذا يعقل
ثالثا

عندما تصر مصر بعد صدور حكم قضائى يمنع تصدير الغاز الى اسرائيل ومع ذلك تصدره لها هذا ما يدعوا الى الشك فى القلب

هذه هى بعض الأسباب الحقيقيه

والمطلوب من مصر هو فتح المعبر بصوره نهائيه

فليس من المعقول ان اغلقه إرضاءا لإسرائيل على حساب اخى المسلم الذى يموت من قلة المعونات عنده ولا يفتح فقط للمصابين الذين هم فى عداد الأموات
ومنع تصدير الغاز الذى حكمت محكمة القضاء الإدارى بمنع تصديره لإسرائيل
وبعد هذا لن يستطيع اى كائن من كان ان يقول اى شئ علي مصر بسوء

هذا ما يخص مصر اما ما يخص باقى العرب فالعرب اجمعين مدانون

فلابد من ان تقطع الدول العربيه العلاقات نهائيا مع اسرائيل من تصدير للبترول وعلاقات سياسيه وخلافه

ولا يقف الكلام عند حد الشجب والإدانه وفقط وهذا ما اتمناه من القمه اللى لسه مش عارفين يتجمعوا فيها

فالكل يرمى الحمل على الأخر ويرمى باللوم على الأخر وكما قال الأمين العام للجامعه

اللى مش عارفين يحددوا ويلا يتفقوا على مكانها هناك انقسامات بين العرب وهذه هى الحقيقه فكل منهم فى وادى وكل منهم يحافظ على كرسيه وبلده والباقين لا يلزموه فى شئ
اما بخصوص الجهاد فهو امر لابد ان تحدثنا نفسنا بيه هو اضعف الإيمان ان تحدثك نفسك بالجهاد الذى اوجبه علماء المسلمين فى اوقات سابقه على كل مسلم
وعندما تكون الصوره بهذا الشكل لابد ان اتحدث عن الجهاد

وغيرها من الصور المنتشره على ا لمواقع لابد ان تحدثنى نفسسى بالجهاد كل مسلم لابد له من ذلك

اما الحرب ليست من شأننا نحن الشعب انما من شأنهم هم

الحكومات العربيه لأنهم هم من سيسألهم الله عن هذا يوم العرض والحساب

نحن فداؤك يا غزه

ان الحمد لله نحمده ونستعين به فى شدتنا ونستغيث
ونعوز بالله من شرور انفسنا ومن سيئات اعمالنا
اللهم لا تؤاخذنا بما فعل السهفاء منا

اولا واجب اعتزار لشعبنا الغزاوى لما يحدث فيهم ولا يكن فى مستطاعنا سوى الدعاء لهم بالتثبيت والتوفيق

فالقلب يخفق كلما سمع الأخبار والعين تدمع كلما رأت الأشلاء والجسس من الشهداء على الأرض
ولا تجد من العرب او بمعنى اكثر من حكام العرب من يحرك ساكنا
فكل العرب خرجوا فى مظاهرات لفتح باب الجهاد ووقف العدوان على غزه

نعم الكل نائم فى سبات عميق

يدى ترتجف وانا اكتب هذا المقال
دمعى ينزف عليكى يا غزه
وماذا نحن فاعلون اصبحنا غرباء فى ارضنا ايضا قلة حيلتنا زادت عن حدها ولا نعلم ماذا بعد غضبنا

اصبحنا محتلون فى ارضنا من قبل حكومتنا الذين هم منا ولا نقوى على ان نرسل لكم حتى الدواء

ولا حول ولا قوة الا بالله

اخوانى فى غزه لكم الله
وكان الله فى عونكم طالما تدافعون عن ارضكم وحقوقكم فإصبروا ففى كل الحالات الفرح اما بالنصر او الشهاده
وبشر الصابرين

وحسبنا الله ونعم الوكيل

مين السبب فى القطع

طبعا كلنا بنتعامل مع الإنترنت وطبعا كلنا حسينا بالخلل اللى حصل يوم الجمعه واللى مازال اعراضه موجوده معانا الى وقتنا هذا
طيب تعالوا نسأل نفسنا ايه السبب فى القطع
كلنا فاكرين القطع اللى حصل فى بداية السنه فى يناير الماضى وده كان فى المياه الإقليميه لمصر وكان على بعد 8.2 كيلومتر من الإسكندريه
وتأثر بيه الإنترنت فى مصر بنسبة 70% ومفيش اى سبب ظهر الى الأن
وفى فبراير من نفس العام كان بالقرب من الإمارات وبرضه مش عارفين السبب خريطه توضيحيه لمسارات الكابلات البحريه فى العالم

والمره دى جنوب ايطاليا ودول مش كابل واحد المره دى لا دى بالجمله
ومع ذلك لم يتحدد الى الأن السبب
ودى عايزه سؤال
الكابلات المره دى قطعت النت عن مناطق محدد وهى جنوب شرق اسيا وبعض من الدول الشرق اوسطيه مصر وبعض من الدول العربيه
هى اكيد سمكة قرش هى اللى عارفه طريق الكابلات وبتروح تعضعض فيهم

او سفينه فضلت ماشيه مئات من الكيلو مترات وكل مكان فيه الكابل كانت بترمى الهلب بتاعها علشان يتعلق فيها الكابل ويتقطع
المهم انتوا كده عرفتوا الكابل اتقطع ليه اما سمكه او هلب متعلق فى سفينه ماشيه او حاجه تانيه انتوا عارفينها طبعا
يعنى تكون سمكه اكبر ليها مصلحه ان النت يقطع فقط عن الشرق الأوسط وبعض الدول الجنوب شرق اسياويه اللى هى العربيه يعنى
المهم اننا نعرف ازاى ممكن نصلح الكابل ده بس قبل تصليحه نعرف تركيبته
تركيبة الكابل البحرى كالأتى 1- غلاف من البولي إيثيلين 2- غلاف بلاستيكي 3- أسلاك حديدية مشدودة 4- حاجز مضاد للماء من الألمنيوم 5- غلاف من البولي كاربون 6- ماسورة من النحاس او الألمنيوم 7- جل بترولي 8- الألياف البصرية
والتصليح كالأتى
عادة يمكن تحديد موقع العطب أو القطع بواسطة المهندسين على اليابسة، اذا ان المناطق الاكثر تأثرا بانقطاع الخدمة تساعد في تحديد اي جزء من الكابل اصابه العطل.
ولتحديد الموقع بشكل اكثر دقة يقوم مهندسو الكابلات بارسال نبضات ضوئية عبر الياف الكابل باستخدام جهاز يسمى مقياس الانعكاس الزمني الضوئي.
وعندما تصل النبضات الى الجزء المعطوب او المقطوع من الكابل ترتد الى الجهاز، وبحساب الوقت الذي استغرقته يمكن للمهندسين تحديد مكان العطب في مسافة عشرات الامتار فقط.
ثم يتم استخدام سفينة كابلات خاصة

مزودة بآليات تعمل بالتحكم عن بعد.
واذا تمكنت تلك الاليات من تحديد مكان الكابل يمكنها قطع الجزء المعطوب وسحب الكابل الى السفينة.
او يتم استخدام رافعة هيدروليكية ترفع الكابل كله الى السفينة.
و: "الخيار الاول افضل، لانه يمكنك رفع الكابل عند المنطقة المعطوبة لكن الرافعة ليست بهذه الدقة".
بعد ذلك يمكن اصلاح الكابل على سطح السفينة حيث يقوم الفنيون باستبدال الالياف المعطوبة في الكابل
وبكده اكون خلصت ويارب أكون قدرت احدد ليكوا مين السبب فى العطل وهى السمكه الكبيره

اللى انتوا كلكوا عارفينها ودى ليها مصلحه ان الدول العربيه ينقطع عنها النت
والله اعلم ليها يمكن يكون السبب صياد إصتاد حد من عيلة السمكه دى
واكون عرفتكوا الطريقه الفنيه فى تحديد وتصليح الكابلات
ويلا بقا ادعوا على السمكه وربنا يهد القوى ويصحصح النايم او اللى عامل نفسه نايم