كتير بيسألونى انتى مين (هى دى مصرمنتظره ايه تانى ممكن يحصل فيها )




بداية انا عايز اقول انى فعلا مستاء جدا جدا
مستاء من اللى حصل واللى بيحصل واللى هيحصل لسه فينا
نبتدى منين الحكايه نبتدى من الأول ولا من النهايه
لما عباره يموت فيها 1414 مواااطن مصرى مفيش حد يدور ويقول فلان هو المسئول


نبتدى الموضوع بإختصار من الأول

لما العباره غرقت حصل ايه؟
الدنيا كلها صحيت على الخبر الأسود ده والكل بيقول السلام غرقت
مهو كده كده السلام غرق من زمااااااان اوى من ايام ما بعناه على الورق
المهم خلينا فى موضوع عبارة الموت دلوقتى
انا بس عايز اقول لما تتشكل لجنه من مجلس الشعب وتدين اللجنه الشركه
والشركه تصرف تعويضات بالملاين بل بالمليارات ده معناه ايه يعنى تبقى مدانه وتصرف تعويضات
والنهارده او تحديدا 27/7/2008 يصدر حكم قضائى ببراءة صاحب الشركه وبعض المتهمين فى هذا الحادث من كل التهم وهو
السيد ممدوح اسماعيل
وخلوا بالكوا انا مش بدين القضاء انا عارف ان القضاء له اوراق بيتكلم عن طريقها بس متنسوش ان الورق ده مش شرط يكون سليم وطرق التذوير كتيره جدا وممكن الفبركه واللعب بالورق ده مفيش اسهل منه
الأول ثبت فى محضر الجلسه فى تاريخ غرق العباره ان السيد ممدوح اسماعيل كان عارض العباره للبيع لرجل اعمال سعودى ولكن المحكمه النهارده بتبرأ سيادته من التهمه لأنه مش مالك اساسا للشركه وانه كان مجرد وكيل لأعمالها فى مصر

(طيب ازاى عرضها للبيع وهو لم يكن مالكها )

انا مش ضد ان الناس تتبرأ وإن العدل ياخد مجراه بس قبل الحكم ده مش كان من الأفضل يقولوا مين المتهم الحقيقى
طيب ده نقول عليه ايه
انا مش هتكلم فى الموضوع قانونا فأنا لست خبير فى القوانين



وانما هتكلم عن روح القانون انا عايز اسأل عن الناس دى دمهم راح فين


نقول لأهالى الضحايا دم ولادكم اللى اتغرق بيه البحر الأحمر وخلاه فعلا احمر راح فين ؟؟؟


بلاش السؤال الصعب
لمن تشتكى هذه الأم اللى بيحصل بعد لما القضاء اللى بينفذ عدالة السماء فى الأرض منصفهاش



تعمل ايه اهالى الضحايا دول

نداء الى القضاه
يا قضاة مصر


ان صدمة الموت هينه اهون من صدمة الذل والإحساس بقلة الحيله امام الظلم القائم اذا حكمتم على هؤلاء بالبراءه


انا لست ضدهم ولا اهالى الضحايا ضدهم ولكن قبل الحكم لهم بالبراءه نريد ان نعلم منكم من الجانى
اعلمونا من الجانى من متحمل هذا الخطأ من من .......؟؟؟؟؟؟؟؟؟؟؟؟؟؟...............


واذا انتوا مش فى صفة الناس دى وحسيتوا بيهم قبل احساسكم بالقانون مش عارف يروحوا ليمن
(اقولكم ليهم رب اسمه الكريم وهو المنصف والعادل والجبار)

وكل مصر صغيرها وكبيرها ينتظر حكمكم يوم الإستئناف يوم 3/9 ننتظر عدالة السماء لتطفئ لهيب أناس وأطفال وشيوخ رحلوا عنهم زويهم واحبائهم



وكلهم فى مقبره واحده مقبره جماعيه

بعد ان فرقتهم الأمواج جمعتهم هذه المقبره


نحن ننتظر الإنصاف فهل من منصف من قبل الله يزيح الهم ويهدئ لهيب قلب ام

لم تنم ولم تجف دمعتها من فراق احبابها وكل املها ان يقتص لها احد من الجانى حتى يهنأ بالهاوتجف دمعتها وترتاح من الم الفراق والم الإحساس بالحصره على فقدان اعز الناس الى قلبها

واخيرا قلبى معكم با اهلى با عشيرتى يا كل المصريين